ONGI ETORRI!!!

Kaixo euskalzaleok:

Hona hemen Begoñazpi Ikastolako Euskera Taldeak sortutako bloga. Bertan, euskeraren inguruko hainbat barri eta baliabide aurkitu ahal izango dozuez.
Zeozer faltan botatzen badozue edota interesgarria dan albisteren bat  topatzen badozue  bidali mezua eta gure blogean sartuko dogu. euskarataldea@begonazpi.org
Gogoratu: Blog hau guztiona da, danon artean egingo dogu!!!

Laster arte!

Euskeraz bizi zara?

Bost urte eta gero, eskerrik asko eta nahi duzuenera arte!

Euskonews Gazteak bere bidea egin du; 2006an martxan ipinitako proiektuak, 2007ko urtarrilaren 12an ikusi zuen argia aurrenekoz. Hastapenetik, argi geneukan gazteen inplikazioa bilatu nahi genuela, eta horretarako, Euskal Herriko ikastetxe pribatu zein publikoetara jo genuen, eta bikaina izan da erantzuna eta ikasgeletako ateak parez pare ireki dizkigute zazpi lurraldeetan. Datuak errepasatu, eta urte guzti hauetan 4.000tik gora neska–mutikok hartu dute parte Euskonews Gaztea prestatzen.

Hauek dira parte hartu duten ikastetxeak, lurraldeka:

Araba: Laudioko La Milagrosa Ikastetxea; Gasteizko Olabide Ikastola; Gasteizko Mendebaldea Ikastetxea; Duranako Ikasbidea Ikastola; Amurrioko Zaraobe institutua; Laudioko Aiara Kantziler Institutua; Aguraineko Aniturri Institutua.

Bizkaia: Trapagako Burdinibarra Institutua; Santurtziko San–Jose Carmelitas Ikastetxea; Bilboko Begoñazpi Ikastola; Urduñako Aintzinako Andra Mari Ikastetxea; Getxoko San Nikolas Ikastola; Portugaleteko Astileku Ikastola.

Gipuzkoa: Errenteriako Oiartzo Batxilergo Ikastola; Orioko Herri Ikastola; Aretxabaletako Kurtzebarri Ikastola; Mutrikuko institutua; Elgoibarko institutua; Bergarako Aranzadi Ikastola; Donostiako Zurriola Ikastola.

Nafarroa: Lizarra Ikastola; Iruñeko Biurdana Ikastetxea; Iruñeko Jaso Ikastola; Iruñeko San Fermin Ikastola; Etxarri Arantzeko Andra Mari Ikastola.

Ipar Euskal Herria: Baionako Bernat Etxepare Lizeoa; Kanboko Xalbador kolegioa; Baionako fakultatea; Hazparneko Ursuia Ikastetxea; Donibane Lohizuneko Done Maria Kolegioa; Donibane Garaziko Mayorga Kolegioa; Kanboko San Mixel Ikastetxea.

Ezin ahaztu bestalde, musutruk gurekin kolaboratu duten norbanakoak:

Amaia Elizondo; Lierni Altuna; Luxio Azkarzabal; Jaizki Fontaneda eta Susana Rodriguez; Andoni Etxeberria; Miren Juaristi; Jon Urutxurtu; Carmen Valois; Benoit Etcheverry; Ainara Iraeta; Itziar Rosado; Haizea Irigoien; Teresa Zavaleta; Aitziber Olalde; Paula Morey Rius; Maitane Garai; Nagore Aiestaran; Loren Bereziartua; Ekain Velez de Mendizabal; Marina Tellechea, Haitz Aldana eta Antton Llanes; Jon Fuente; Belén Girasole; Teresa Sala; Elixabete Etxeberria; Irati Redondo; Izaro Aulestiarte Lete; Asier Muguruza; Arantza Lizarazu; Nerea Sancho; Alex Sarasate; Eneritz Zabaleta; Janire Rodriguez; Iñaki Arrieta Baro; Maite Ithurbide; Nerea Begiristain; Xabi Otazu; Mireia Lazkano; Mari Jexus Artola; Leire Gaceo; Andoni Begiristain; Eneko Gorri; Itsaso Estarrona Elizondo; Nahia Belloso eta Oroitz Sanchez; Mattin Salto; Ainara Maia Urroz; Aitor Ezpeleta; Aines Arizmendi; Eneko Barberena; Ane Abarrategi; Ivan Barrio Diez; Uxue Agirre; David Lopategi Escudero; Koldo Egiguren; Josu Goñi Etxabe; Pilar Faneite Hernández; Leticia Maldonado Arruti; Batiste Ezeiza; Manu Egaña Txopitea; Izaskun Kortazar; Noemi Gonzalo–Bilbao; Martha González Zaldua; Victor Nuñez; Estebe Ormazabal; Borja Ruiz Agirre; Amaia Otazo; Nestor Salaberria; Udane Goikoetxea; Amaia Aranzeta; Argitxu Camus Etchecopar; Urtzi Ugalde; Tamara Arroyo Ramada; Maider Sillero Alfaro; Igor Susaeta; Jexux Aizpurua Barandiaran; Sabina Hourcade; Araitz Mendoza; Miriam Plazaola; Koldo Azkarraga; Maddi Berasaluze; Itziar Amestoy Alonso; Maitane Alvarez; Estitxu Montero; Amaia Zulaika; Iñaki Landa; June Fernández; Alfre Elgezabal; Miren Elizondo.

Eta baita elkarteak ere:

Txatxilipurdi Elkartea; Erdu; Aldezar Elkartea; Kristobal Deuna Eskaut Taldea; Iruñeko Alde Zaharreko Erraldoiak; XiRiMiRi Gazte Taldea; Ayete Ikastetxe Nagusia; Colegio Navarra Fundazioa; Euskal Herriko Gazteriaren Kontseilua; Sahararen aldeko Nuyum Ekartea; Euskadiko Gazteriaren Kontseilua; Karrikaluze Euskaldunon Elkartea; Xisko Gazte Elkartea; Euskalerriko Eskautak Araba; Arabako Bertsozale Elkartea; Nafarroako Unesco–Enea, Udako Euskal Unibertsitatea, Euskal Herriko Bertsozale Elkartea; Gamarra Ostalaritza Eskola; Kutxa Ekogunea; ADEVE; Nafarroako Askagintza.

Horrexegatik gure eskerrik beroenak denori, hau da, urtez urte ekinean jardun duzuen irakurle, kolaboratzaile, ikasle eta irakasleei!

Baina zenbait arrazoi tarteko, Euskonews Gazteak astero zuengana iristeari utziko dio. Itxi egiten dugu, beraz, ziklo bat, eta agur esan beharrean gaude. Pozik goaz, helburua zintzo bete dugulako, baina aldi berean oso triste, betetzen ari ginen lana bertan behera laga behar dugulako.

Euskonews Gaztea posible egin dugun lan taldearen izenean, eskerrik asko eta beti arte.

HABE Liburutegia, erabilera ez-presentziala bultzatuz

Liburutegiko funtsen erabilera ez-presentziala bultzatzeko xedea dauan egitasmo hau aurrera eroateko, batez be, teknologia barriak eta liburutegi-sareaz baliatzen da HABE.

Era berean, Liburutegiaren espezializazio-eremuaren inguruan dabilza ikerketa eta ikasketa taldeetako partaideei behar dabezan dokumentuak be helarazten deutsiez.

2011ko abenduaren 16an, lau hitzarmen sinatu eban HABEk Soziolinguistika Klusterragaz, Baionako Iker Ikerketa Zentroagaz, Mintzola Fundazioagaz eta HIZNET – Hizkuntza Plangintzako graduondokoa kudeatzen dauan Asmoz Fundazioagaz. Hitzarmen honi esker, HABE Liburutegiak on- line zerbitzuak eskainiko deutsoz erakunde horreetako ikerlari, irakasle eta graduondoko ikasleei, Liburutegiko egoitzara bertaratu beharrik izan barik.
Orain dala hiru urte, Euskararen Historia Soziala jorratzen dauan Etxeberri Egitasmoa zala-eta, Euskaltzaindiak eta HABEk sinatu eben hitzarmena izan da oraingo lau honeen bide-erakusle; izan ere, oso emonkorra izan da alkarlana; batik bat, HABE Liburutegia Etxeberri Egitasmoko ikertzaileek behar izan dabezan dokumentuen hornitzaile nagusi bihurtu dalako.

Euskal Herriko eta, batik bat, nazioarteko 100 bat aldizkarik osatzen dabe on- line zerbitzu honen muina. Zerbitzua baliatzeko, Liburutegiko bazkide egin ondoren, zein aldizkariren alertak jaso nahi diran aukeratu behar da. Handik aurrera, erabiltzaileak bere postontzi elektronikoan jasoko dauz, argitaratu ahala, aukeratu dauazan aldizkarietako zenbaki barrien alertak, hau da, aurkibideak. Aurkibidea jasotzen dauanean, intereseko artikulurik ikusten badau, eskatu orduko jasoko dau artikuluaren testu osoa, PDF formatuan. Guztia, jakina, posta elektronikoaren bidez. Zerbitzu hau helbide honetara zuzenduz bideratu daiteke: alertak@habe.org

Liburutegi- sareei jagokenez, egungo biblioteken helburua ez da ahalik eta dokumentu gehien eskuratzea, sarean lan eginez biblioteka bakoitzak dauana besteen eskura jartzea baino.
Badira hiru urte HABE Liburutegiak, Espainiako Estatuko liburutegi-sarerik garrantzizkoenean.  REBIUN (Red de Bibliotecas Universitarias) sarean esku hartzen dauana, REBIUNek o partaideen artean dokumentazio zientifiko asko alkartrukatzen da; bereziki, aldizkarietako artikulu digitalak e-postaz bidaliz eta, jakina, liburuak liburutegien arteko mailegu-zerbitzuaren bidez.
Bestalde, orain dala urtebetetik hona, Euskadiko Irakurketa Publikoaren sarean be parte hartzen dau HABEk liburutegien arteko liburuen maileguari jagokonez. Horrela, HABE Liburutegiko liburuak Udal Liburutegi gehienen bidez jaso eta itzuli daitekez maileguan. Oraingoan be, HABE Liburutegiko egoitzara joan beharrik izan gabe.

Dana dala, goian aipatutako zerbitzu-aukerak ez dira mugatzen Liburutegiak bere egoitzan dauazan funtsetara; izan be definituta daben eremuko edozein dokumentu lortzeko ahalegina egiten dabe. Horretarako, Euskal Herriko bibliotekek nahiz nazioarteko liburutegi nazionalek eskaintzen dabeza zerbitzuak baliatzen dabez: Azkue Biblioteka, Sancho el Sabio, Biblioteca Nacional de España, British Library, Bibliothèque Nationale de France, Library of Congress...

HABE Liburutegia, biblioteka espezializatua izateaz gain, publikoa be bada. Ondorioz, HABEko teknikariei eta euskaltegiei ez ezik, gai honeetan interesa daben ikertzaile, irakasle nahiz ikasleei ere eskaintzen deutse zerbitzua, oro har, gizarte osoari.
Azken batean, Liburutegiaren helburua da gizarte elebidun/eleaniztuna sustatzeko zerbitzuak eskaintzea, bai administrazio publikoei, erakundeei, enpresei, taldeei..., bai ikerketa-munduan dabilzanei, baita gizabanako bakoitzari be. Guztiok dogu hizkuntza egoera barrietara egokitzeko beharra. Horregaitik, ba, Liburutegi honen xedea da zerbitzuak eskaintzea aipatu gizarte-eragile orori, hizkuntzen eta eleaniztasunaren alde didaktiko, soziologiko, psikologiko eta hezkuntzakoetan, arreta berezia eskainiz euskarari eta Euskal Herriko egoera eleaniztunari.
gidatuak, etab.
Gogoan izan: ”liburutegiak erabiltzeko dira”.

Euskarazko wikipediari bultzada

Dakigunez, euskararen erabilera esparru guztietan sustatzeko, derrigorrezkoa da baliabide eta tresnak, teknologia barrien arloan batez be, eskaini eta emotea. Horregaitik, ba, 2011n Hizkuntza Politikarako Sailburuordetzak euskarazko eduki entziklopedikoak sarean jartzeko garatutako egitasmoa.

Eusko Jaurlaritzak  bereak diran eduki entziklopediko interesgarriak, Lur Hiztegi Entziklopedikoa eta Lur Entziklopedia Tematikoa kontuan izanik, Kultura Sailak jabetzan dauazan jatorrizko eta egokitutako euskarazko edukiak Wikipediaren bidez sareratzea erabaki dau.

Baina zergaitik aukeratu da Wikipedia?Kultura Sailak bultzatu nahi dauazan lerroekin  aukera eduki libreen aldeko filosofiarekin bat datorrelako; urtenbide teknologiko egokia, azkarra, erabilgarria eta merkea dalako; lana egiterakoan, parte-hartzea, osagarritasuna, alkarlana eta lankidetza sustatzen daualako. Sarreretatik % 20 Euskal Herriari buruzkoak dira, eta % 80 eduki unibertsalei lotutakoak. Lana aurrera eroateko, Eusko Jaurlaritzako Kultura Sailak Elhuyar Fundazioa kontratatu eban lehiaketa publiko bidez.Honegaz batera hainbat euskal wikilari izan dalarik lanean. Oinarritzat hartu beharreko materialek 20 urte baino gehiago dabezala kontuan izanda, lantaldeak, beharrezkoa izan danean, hautatutako sarrerak egokitu, zuzendu eta eguneratu egin dauz.

Ekimen horri esker, Wikipediaren euskarazko edizioak 110.000 sarrera baino gehiago dauz 2011ko abendutik. Teknologia barriek eragin onuragarria izan dabe euskararen berreskurapenean. Horregaitik, Jaurlaritzak Informazioaren eta Komunikazioaren Teknologiei garrantzi handia emoten deutse Euskararen Aholku Batzordearekin batera prestatzen ari dan Euskara Sustatzeko Ekintza Plan barrian eta urteroko aurrekontuetan.

“Beste larogei urtian”

25 urteko ibilbidea osatu dau jada Euskal Herriko Bertsozale Elkarteak eta hori «ospatzeko» Beste larogei urtian izeneko liburu eta DVD-dokumentala argitaratu dau. Alberto Barandiaran kazetari eta idazleak osatu dauz liburua eta dokumentalaren oinarrizko gidoia, eta Felix Irazustabarrena, Jon Artano eta Haritz Arrizabalaga arduratu dira DVDaren garapenaz. Iñaki Murua elkarteko presidenteak, argitalpenaren arrazoiak emon ebazanean hauxe aitortu eban: «Gurekin Euskal Herrian lanean aritu zirenentzat eta ari direnentzat testigantza baten modukoa da».

Honen esanetan, 25 urteko autokonfiantzazko eta autoantolaketako ariketa izan da, bertsolaritza tradizio moderno bilakatzeko bidean. Alkarteak hasi zanean, 500 bazkide ebazan eta egun, 2.300 bat. Soldatapeko langile bakarra eban orduan, eta orain, aldiz, 69. Ikaslerik ere ez eban, eta 2012an, barriz, 20.000tik gora. Bidean, hainbat traba eta krisi  gainditu behar izan dauz, hala nola, ekonomikoak, instituzionalak, alkartearenak berarenak...». Horregaitik guztiagaitik, «eta umil-umil» esan arren, Murua «harro» dago egindakoarekin.

Liburuaren  165 orrietan,  zer ikusi etazer irakurri badagoala be adierazi eban. Alkartea sortu aurretik egoan testuingurutik  etorkizuna margotu arteko ibilbidea agertzen deuskue. Honetaz gai, alkarrizketa eta argazkiak be gehitu behar jakoz.

Alkartearen izena hasieran Bertsolari Elkartea izan zan, geroago Bertsozale Elkartea izena hartu ebalarik.

Hiahoka, hizkuntza ahotsaren eta kantuen bitartez sentitzeko proiektua

Banaiz Bagara alkarteak, Mintzola Fundazioagaz eta Euskal Kantuzaleen alkarteagaz lankidetzan, Hizkuntza Ahoz eta Kantuz (HIAHOKA) sentitzeko esku-liburua eta CD-a prestatu dauz. Proiektu honek euskara ikasteko eta erabiltzeko bide barriak ireki ez ezik irakasleei materiala eskaintzea be badau helduru.

Eskaintza hau batez be, beste kultura eta hizkuntzetatik etortzen diran pertsonei eskaintzen jake baina baita euskararekin "arroztasuna" sentitzen daben guztiei be. Kantuak ikasteko ahots teknikak eta ahots eta gorputz ariketak hizkuntzara hurbiltzeko erabiltzeko proposatzen dabe. Hori guztia modu ludiko eta parte-hartzaile batean; hau guztia  euskal kantuak eta Euskal Herriko kantu kultura transmitituz eta kulturen arteko ulermena beste modu batean esperimentatuz.

Mireia Otzerinjauregi eta Ana Elorza kantu irakasleek 2011n emon ebezan hainbat kantu saio eta tailerretan erabilitako ariketak eta esperientziak irakasleentzako liburu baten bildu dabez. Saio hareetan beste hizkuntzetatik eta beste kulturetatik (baita beste musika kulturetatik be) etortzen diran ikasleakaz euskal kantuak landu ebezan: ahoskatuz, errepikatuz, erritmoz, gorputzez, zatika ezeze taldeka eta kalean kantatuz be. Teknika honeeek Mintzola Fundazioan burutu ziran  tailer bitan kantu eta euskara irakasle eta beste arloko kultur eragileekin alkartrukatu ebezalarik. Aldi berean, Euskal Kantuzaleen Elkarteak antolatutako ekitaldien bitartez, hainbat kale-kantujira eta kantu topaketetan be parte hartu eben, euskal kantuen kultura herrikoia eta kolektiboa zabaltzeko asmoz.

Egitasmoaren metodologiaren oinarria ahozkotasuna da eta hori ariketa sinple eta errepikakorrez lortu nahi dabe, etorkinen integrazioan kantuak dauan garrantzia be nabarmenduz. Aurrerantzean, abestien bidez kultura ezbardinak ezagutu eta euren artean hurreratuko ahal dira!

HIZKUNTZA LABORATEGIA

Gasteizko Letren Fakultatean dogu UPV/EHUko Hizkuntza laborategia. unibertsitate alkarte osoak erabili ahal izango dauan laborategi honek, unibertsitatean bertan hizkuntzak ikasteko aukera erraztuko deusku.

Urtarrilaren 20tik aurrera aukera bikaina izango dogu guztiok, orain arte filologia ikasleentzat bakarrik  irekita egoan  Arabako campuseko Letren fakultateko lehenengo solairuan dagoan Autoikaskuntzarako Laboratorio Multimedia erabiltzeko. 

 Laborategi hau bariku guztietan izango da irekita, urtarrilaren 20tik  ekainaren 29ra arte, 9:00etatik 19:00etara arte. Gainerako egunetan, orain arte bezala, filologia ikasleek baino ez dabe erabiliko.

Hizkuntza laboratorio honek 28 postu eskainiko dauz,  ingelesa, frantsesa eta alemana ikasteko ez ezik ikaskuntza maila guztiak, hasierako mailatik hobetze mailetaraino, be eskainiz. Horrez gain, laborategia irekita dagoan bitartean, erabiltzaileek, behar izanez gero, laguntza informatiko, pedagogiko eta linguistikoa izango dabe.

Bestalde, tutoretza presentzial eta banakakoak izateko aukera be egongo da 20 minutuz, ordutegiaren barruan bertan egongo dan irakaslearekin hartutako hitzordua eginda.

Zerbitzu honen kudeaketa Nextlingo, hizkuntzen formazioko enpresak egingo dau eta instalazioak ikasturtean zehar erabiltzeko prezioa 30 eurokoa da eta, behar izanez gero, 20 euro gehiago ordainduko da maila proba egiteagaitik.

Laborategiaren erabileraz gain, bestelako aukerak be eskainiko dira. Hala nola: "Film Club", astero ingelesez, frantsesez edo alemanez azpititulatutako jatorrizko bertsioko filmak pantailaratuz; "Book Club", jatorrizko hizkuntzan irakurritako nobela klasikoa, ingelesez, frantsesez edo alemanez irakurri eta beste irakurleekin iritziak trukatzeko aukeraz, ahozko praktika bidebatez sustatuz; hitzaldiak, ingelesez, frantsesez eta alemanez emondakoak, hizkuntza honeei loturiko gai desberdinei buruz; eta "Truke zerbitzua", bertakoen eta atzerriko ikasleen arteko trukeak erraztu eta sustatzeko plataforma.

Zer deritxozue?

Zelan neurtu haur txikien euskara garapena?

Kontseiluak abenduan Donostian antolatutako jardunaldietan, Komunikazio Garapena Neurtzeko Zerrenda izeneko tresna aurkeztu eben Mondragon Unibertsitateko Iñaki Garciak, Salamancako Unibertsitateko  Andoni Barreñak eta EHUko  irakaslea dan  Marijo Ezeizabarrenak,. Tresnaren helburua  haurtxoek euskara zelan garatzen daben aztertzea eta balizko atzerapenak garaiz detektatzea da.

 KGNZ tresnaren aurkezpena hiruren artean egin baeben be, ikerketa taldeko partaide dira honako honeek be: Nekane Arratibel eta Julia Barnes (Mondragon Unibertsitatea) eta Margareta Almgren (EHU).

Komunikazio Garapena Neurtzeko Zerrenda (KGNZ) Mac Arthur-Bates Communicatives Development Inventories (CDI) tresna dau oinarri, jakina, euskarara egokituta. Haur txikien hizkuntza garapena ikertzeko azterlariek gurasoen laguntza izan eben.Ikerlariek hiru galdetegi prestatu ebezan, 8-15 hilabeteko haurrentzat, 16-30 hilabetekoentzat eta 30-50 hilabete artekoentzat. Galdetegi bakoitzaren bidez jasotako erantzunekin ikerlariek hainbat elementuri buruzko informazioa lortu nahi eben. Lehenengoan, haurrek zein hitz ulertzen eta esaten eben jakiteko eta keinu bidezko komunikazioa zelan garatzen eben ikusteko. Bigarrenean, hiztegiaren eta morfologiaren ekoizpena, esaldien luzeera eta konplexutasun morfosintaktikoa aztertu ebezan. Hirugarren galdetegiaren bidez, bigarren galdetegiko gai berbeak ez ezik kontzeptu abstraktuak be ikertu ebezan.

Lan honek jarraipena izango daualakoan, gogor ekin beharko deutsagu lanari.

Hemen dogu sagardoa!

Hasi barri da aurtengo sagardo denboraldia, 13:45ean edan dau lehen tragoska Julian Iantzi telebistako aurkezleak, Astigarragako Petritegi sagardotegian. Ekitaldi honen aurretik, Iantzik berak landatu dau sagarrondoa.

Sagardogileek jakinarazi dabenez, aurten hamar milioi litro ekoiztu dabez, iazko antzera. Ekoizleen esanetan, sagardoa "aurreratua" dago, "azukrea janda dago eta". Sekoa, txinparta finarekin, tonikoa eta freskoa, "edangarria oso".

Jai giroan ibili dira, bertso eta trikiti soinua nagusi,. "Sagardoa guk geuk defendatu behar dugu", esan du Iantzik, "kanpotik ez dira etorriko-eta hain gurea den hau defendatzera". 

Ongi etorri 2012ko sagardoa!

GAURKO EFEMERIDEA

1924. Eduardo Txillida eskultore donostiarra jaio zen (h. 2002)

“Bateragarriak” dira Helsinki eta Bilboko Guggenheima

Hauxe da  Bilboko Guggenheim museoko zuzendaria dan Juan Ignacio Bidarte  Helsinkin  Guggenheim museoaren bideragarritasunaren inguruko azterketaren aurkezpenean adierazi dauana. Bilborentzat interesgarria ez ezik museoa baino gehiago, erakusketa espazioa be izango izango dalakoan dago eta. Azken batean,  bilduma propiorik ez dau izango eta diseinura zein arkitekturara bideratua egongo da, teknologia azpimarratuko daualarik.

Egitasmoak Helsinkiko Udalaren eta Bilboko Guggenheim museoaren batzorde exekutiboaren onespena behar dau. Gogoratu behar dogu Bilboko Guggenheim museoak marka berarekin Europan eraiki daitekezan museo barriei betoa ezartzeko eskubidea dauala, beraz, badau eraginik. Dana dala, martxora arte badago astia, orduan hartuko baita Museoaren inguruko behin betiko erabakia.

Helsinkikoa  munduko seigarren Guggenheim museoa izango litzateke, hegoaldean egingo leukie, hirigunean bertan, eta hamabi mila koadro izango leukez, horreetatik  heren bat erakusketetarako erabiliko litzateke. Aurrekontua 140 milioi eurokoa da eta urteko bisitarien aurreikuspena 400.000-650.000.

New York, Bilbo, Berlin eta Venezian dagozanez gain, 2013an Abu Dhabin be zabalduko dabe Guggenheima. Lortuko ete da Helsinkin eraikitzea?

PIRATERIAren eraginez

Zer eta zergaitik gertatzen da? Kultura mundua galtzaile atarako ete da? Aspaldi dabilz, kantari, idazle… aztoraturik, baina arrazoi ete dabe? Gaur egun badago teknologiaren abantailetatik etekina atara nahian ez liburu ez diska erosten ez dauanik. Baina prezioei begiratuz, hauxe adierazi daikegu: zenbat irabazi behar dabe, ba, artistok? Ezin daikiez prezioak jaitsi? Hauxe da gakoa: dirua.

Dana dala,  eurek horretatik bizi dira eta etekinik handiena atara gura dabe. Horregaitik,ba, atzo bertan Lucia Etxebarriak facebooken azaldu ebanez, denboraldi baten, idazteari itziko deutso. Jakin daki, azken eleberriaren kasuan,internetetik  legez kanpoko kopia gehiago jaitsi dirala saldu diran aleak baino. Egoera hau aldatzen ez dan bitartean, behintzat, ez dau idatziko. Baina  honen aurrean Luciak jasotako mezuak ez dira guztiak aldekoak izan, eta honeen aurrean aho bete hortz geratu da, ez baitau ulertzen jendeak bera ez ulertzea eta gainera kritikatzea.

Zer erantzungo deutsogu Lucia eta bera bezala pentsatzen dabenei?

Nabarra aldizkariak ateak itxiko dauz.

Zorioneko dirua! Zenbat laguntzen deuskun! askok eta askok ez dauala balio diñoan arren. Hamar urtez argia ikusi ondoren,  diru arazoak dirala eta, Nabarra aldizkaria argitaratzeari itzi egingo deutse. Nafarroan sortu bazan be, Nabarrak Kultur Taldearen eskutik Bizkaian ezartzea lortu zan.  Ahaleginak ahalegin, azken urtean harpidedun eta laguntzaileei esker iraun dau, gastuak  murriztean, jaso beharreko laguntzak eskasagoak izan dira, adibidez, ez dau 2011rako aitortuta dauan Jaurlaritzaren dirurik jaso.

Bakoitzak jakingo dau zer egin,ez?