Kultura Bonua

Jaurlaritzaren Kontseiluak 2011-2012 Gabonetako kanpainarako Kultura Bonua garatzeko eta sustatzeko Kulturako sailburuaren Agindua onartu dau. Horretarako 660.000 euro erabiliko dira, hau da, 44.000 bonu saltzeko diru-kopurua.

Euskadiren ekonomia bizibarritzeko ekintzak garatzeko Eusko Jaurlaritzak dauan egitasmoaren barruan, eta aurreko kanpainetan lorturiko emaitza onak ikusirik, Kultura Sailak "Kultura Bonua - Bono Cultura" programa barritu nahi dau, arte- eta kultura-ekoizpenaren merkatua bultzatzeko ekimena, hain zuzen 2011-2012 Gabonetako kanpainan, Euskadin, aipaturiko kultura-produktu horreek suspertzeari begira.

Euskarri ezbardinetako kultura-produktuen erosketa egiteko lagunduko dau diruz Eusko Jaurlaritzako Kultura Sailak, kultura-bonu batzuen bidez (44.000). Bonuok hautatutako finantza-entitatearen bitartez jarriko dira salgai, eta horreen bitartez erabiltzaileak bere diruaren balioa handitu ahal izango dau, bai liburuak edo diskoak erosterakoan, bai museo batean bisita egiteko edo zinera, antzerkira edo kontzertu batera joateko.

Bonu bakoitzak 25 euroko kostua izango dau, baina 40 euroko balioa emongo deutso erabiltzaileari kanpainia honi atxikitzen diran dendetan liburuak edo musika-euskarriak erosteko, edo museo eta zuzeneko ikuskizunetan edo bestelako ekitaldietarako sarrerak erosteko. Bonu bakoitzaren 15 euroko alde hori Eusko Jaurlaritzak ordainduko dau.

Eraginkortasuna eta programaren gaineko kontrola bermatzeko, Kultura Sailak aukeratutako entitate kolaboratzaileak txartel, multizerbitzu kutxazainen edo antzekoen bidez baino ezingo dau kultura-bonua saldu, nahiz eta, Eusko Jaurlaritzak berariaz baimenduz gero, bestelako biderik be erabili ahalko dan. Alde horretatik, kreditu-txartel bakoitzarekin kultura-bonu bat baino gehiago erostea eragozten daben mekanismoak jarriko dauz entitate kolaboratzaileak, txartela blokeatuz zein bestelako prozeduraren baten bidez.

Zer deritxozue ekimen honi? Kultura sustatzeko balioko ete dabe?

Euskaltzaindiaren 'Erlea' bosgarren alea: komiki eta autoak irakurgai

Gorka Martinez(BBK) eta Andres Urrutiagaz(Euskaltzaindia) ondoan ebazala, idazle eta euskaltzain osoa izateaz gain  Erlea aldizkariaren zuzendaria be badan Bernardo Atxagak kultura argitalpen honen bosgarren alea aurkeztu euskun. Izan ere, Euskaltzaindiak argitaratu, BBK-k babestu eta Pamiela argitaletxeak edizio eta diseinuaz  dau ardura.

Bosgarren ale honek  gai nagusi bi ditu ardatz:  batetik, Euskal Herria eta komikiak eta bestetik, autoen mundua. Atxagak esan ebanez, Erlea-n Euskal Herriko eskarmentu handiko idazleek nahiz ia anonimatuan ari diran sortzaileen lanek dabe  lekua.

Oraingo zenbaki honetan Erlea-k bere ikurra aurkitu dau, eta horren erantzulea Jon Zabaleta marrazkilaria da, honek erletxo batzuk tintontzi batean bueltaka irudikatu dauzalarik.

Bestalde, Erlea-ren beste atal finko bat Poemaren atzeko aldea da. Egileek euren poesiaren azalpena emon behar dabe, condicio sine qua non baita hori, zuzendariaren esanetan.

Autoei jagokenez, hainbat ipuin eta bitxikeria azaltzen dira ale honetan.

Bikain ziurtagiriak banatu dauz Eusko Jaurlaritzak

Bilboko   Guggenheim museoa izan zan Eusko Jaurlaritzak hemeretzi enpresa eta erakunderi Bikain ziurtagiria banatzeko aukeratu eban  agertokia. Aurten, Bermeoko eta Arrasateko Udalek jaso dabe euskararen presentzia eta erabilera egiaztatzen dauan urrezko agiria; baita Elgoibarko ikastolak eta Birzikla enpresak be.

Ebaluazio-txostena eskuratua dabe  2011n Bikain Kanpo-Ebaluazioa jaso daben 19 erakundeek. Txosten honen bitartez, euskararen presentzia, erabilera eta kudeaketa maila jakin ahal izan dau erakunde bakoitzak (txostenak 100 bat indargune eta hobekuntza arlo jasotzen dauz, garapen mailaren kuantifikazioarekin batera, 0tik 1000puntura.
Hiru ziurtagiri dagoz, erakundeek hiru parametro horreetan lortutako mailaren arabera: oinarrizko mailako ziurtagiria (baltz kolorekoa), erdi mailako ziurtagiria (zilar kolorekoa) eta goi mailako ziurtagiria (urre kolorekoa). Aurten, saritutako 19 erakunde honeetatik, 7k oinarrizko maila egiaztatu dabe (200-399 puntu artean), beste 7k tartekoa edo zilarrezkoa (400-699) eta 5ek goi-maila edo urrezkoa (700-1000 puntu).

Euskara lan munduan sustatzeko, Eusko Jaurlaritzako Hizkuntza Politikarako Sailburuordetzak 2006an abiatutako LanHitz programaren barruan dago ziurtagiri hau. Garai haretan Ibarretxe lehendakariak hauxe esan eban: enpresetan euskaraz hitz egiteak «berezko zerbait izan behar dau, naturala», «Eleanitza da euska gizartearen oraina eta geroa, eta eleanitza da erakundeen, enpresen oraina eta geroa».
Azkarate gazteen prestakuntzaz mintzatu zan: Ikasketak euskaraz egin eta euskaraz lan egiteko prestatuta dagozan gazteek «euskara gitxiko» lan mundura egiten dabe jauzi. Beraz, horixe da ekidin nahi dana: «Eskolan euskaldundutakoa eta euskaraz formatu dana ez daiala lan munduak erdaldundu».
Bikain ziurtagiri «publiko, ofizial, independente eta doakoa» da. Enpresek eta esparru sozio-ekonomikoko erakundeek garatutako hizkuntza normalizaziorako prozesuen maila egiaztatzea eta aitortzea dau helburu, «era bateratu eta sistematizatu batean.

Aurtengo Lauaxeta saria Gerediaga Elkartearentzat

Sari honen VII.edizioan, .Jose Luis Bilbao Bizkaiko ahaldun nagusiak Lauaxeta saria gaur bertan emongo deutso  Gerediaga Elkarteari, herrialdean "euskara zabaldu, sustatu eta normalizatzeko eginiko ahaleginagaitik".

Lauaxeta Saria ohorezko sari sinbolikoa da, eta Bizkaian euskara zabaldu, sustatu eta normalizatzeko eginiko ahaleginagaitik nabarmentzen diran irabazi asmorik gabeko taldeak edo pertsonak saritzen dauz.

Gerediagak hainbat lan arlo garatu ditu; besteak beste, Durangaldeko ondare historiko, artistiko eta dokumentala berreskuratzea, eskualdearen iragana ikertzea eta ikerketa lan barriak sustatzea. Durangoko Liburu eta Disko Azoka, aurtengoa 46. edizioa izango dana,be berak antolatzen dau. Hau guztiau, Durangaldea ezagutaraziz eta tokiko erakundeei aholkularitza eskainiz, jakina.

 Nahiz eta sortu zanean, 1965ean, eskualde-kontzientzia izan bere kezka nagusia, urteakaz, nortasun horretan oinarrituta, alkartearen helburuetako bat kontzientzia komuna berreskuratu eta zaintzea izan da, berezko ezaugarriak babestuz eta ahaztuta dagozanak berreskuratuz.

Dokumentategia Ikerketari jagokonez, hainbat arlo jorratzen dauz, hala nola eskualdearen historia, antolaketa eta gizarte-ezaugarriak, edo kultura, gizarte eta ekonomia-ondarea. Dagozanak gorde eta galdutakoak bilatuz, Durangaldeko Dokumentategia helburu horren ardatz bihurtu da.

EUSKERA EUROPAN

Eusko Jaurlaritzako Hizkuntza Politikarako Sailburuordetzako (HPS) ordezkaritza batek Bruselara bidaiatu dau euskarak azken urteotan egin dauan ibilbidearen barri emoteko Europako Batzordeko Eleaniztasuneko Unitatean. Europako Batzordeak Eusko Jaurlaritzaren hizkuntza politikaren bikaintasuna eta Europan erreferentzia izatea nabarmendu dau, baita euskararen industriak egindako ekimen abangoardistak be.

Bruselako Euskadiko Ordezkaritzarekin lankidetzan, Eusko Jaurlaritzaren Kultura Sailak, hizkuntzaren industriari lotutako beste 6 erakundeko ordezkariekin batera, lan-misio bat burutu dau Europar Batasuneko erakundeetan. Horren helburua da, euskal hizkuntza politikaren eta haren sektoreko ekintzak ezagutzera emotea eta Europako erakunde eta kideekin lankidetza-loturak finkatzea.

Eusko Jaurlaritzako Hizkuntza Ikerketa eta Koordinaziorako zuzendari Iván Igartuak Langune (Hizkuntzen Industriaren alorreko Euskal Herriko enpresen alkartea), EHUko Euskara Institutua, Komalingua, Eleka, Elhuyar eta UZEiren laguntzarekin batera, lanaldia izan eben Europako erakundeekin; eleaniztasunari eta hizkuntza dibertsitateari loturako Europako sareen barri izan dabe bertatik bertara.

Euskal Gobernuko ordezkariak, Langunerekin batera, Belen Bernaldo de Quiros Erkidegoko erakundeetako eleaniztasuneko Unitateko buruari euskarak azken urteotan egin dauan ibilbideari buruzko informazioa emon deutso, bereziki Euskara Biziberritzeko Plan Nagusia (1998) onartu zanetik. Euskal ordezkaritzak garatu diran aurrerapen nagusien barri emon dabe, egoera soziolinguistikoa, euskaren lurraldeen arteko elkarlana. Gainera, Informazio eta Komunikazioaren teknologian emandako pausoak jakinarazi dira, arlo hori zuzenean lotuta baitago Langunek egiten duen lanarekin.

Europako agintariek Europa mailan Eusko Jaurlaritzaren hizkuntza politikak egun betetzen dauan erreferentziazko papera azpimarratu dabe eta, horrekin batera, hizkuntzaren euskal industriak zer ekimen abangoardistak dauazan. Erakunde europarrek Eusko Jaurlaritzako HPSko zuzendariak aurkeztutako guztiaren gaineko interes handia erakutsi dabe. Hala, Euskadiri bere jardunbide onak Europa mailan aurkezteko aukera eman jako Eleaniztasunerako Europako Plataformaren baitan.

Bilkura horretan bertan beste gai batzuk aztertu dira: Hizkuntza Politikaren esparruan egungo eta etorkizuneko ekintza eta planak, Autonomia Erkidegoen artean burutzen dan hizkuntza politiken koordinazioari lotutako ekimenak, euskararen kanpoko sustapena, Euskadiren inplikazioa Europako zenbait saretan...

Europako erakundeekin egindako lan-saioak funtsezko une batean egin dira, Europako Batzordeak kultur industriarentzat eta industria sortzaileentzat etorkizuneko programa-sorta aurkeztu dauanean, eta 2014-2020 aldirako Creative Europe izenekoaren barnean sartzen direnak. Creative Europeren bidez, Europar Batasunak kultur industrien eta industria sortzaileen funtsezko eginkizuna aitortzen dau EBaren ekonomiarako. "Kulturaren ekonomia" izenekoa Europako BPGaren % 4,5 da eta EBeko enpleguaren % 3,8 (8,5 milioi pertsona).

Euskararen Nazioarteko Eguna

Jakingo dozuenez, hainbat  izaten dira euskararen omenez egiten diran ekitaldi eta jardunak. Horretako bat, Euskararen Nazioarteko Eguna da, urtero-urtero, abenduaren 3an, Xabierko Frantzisko deunaren egunez ospatzen dana.

Esandako ospakizunak badau aurrekaririk. Ezagunak dira, besteak beste, Errepublika garaian Eusko Ikaskuntzak, Euskaltzaleak Bazkunak bitarte, antolatutako antzerti eta olerti egunak, bertsolari egunak eta antzerakoak. Aipatzekoak dira, bestalde, Espainiako Guda zibilaren ondorioz Iparraldera alde egin behar izandako euskaltzaleek zein bertakoek, alkar hartuta, Euskaltzaleen Biltzarraren babespean egindako lana. Sasoi horretakoa (1949) da, hain zuzen be, Lehenengo Euskararen Eguna.

1995an, Euskal Herritik kanpora bizi diran euskaldunek egindako Lehen Mundu Biltzarrean eskatutakoa bere eginez, Eusko Jaurlaritzak eta Euskaltzaindiak alkar hartu eben eta, ondorioz, Euskararen Nazioarteko Eguna instituzionalizatu. Geroztik, urtero, Erresuma Zaharreko santu euskaldunaren egunez, ospatu izan dabe euskal erakundeek Euskararen Eguna. Lehendakariaren deiari jarraituz ehunka lagun batzen da eta gorazarre egiten deutse euskarari eta euskaldunoi.

Atzo Euskararen Nazioarteko Egunerako Eusko Jaurlaritzak, Araba, Bizkai eta Gipuzkoako diputazioek eta EAEko hiru hiriburuetako udalen ospakizun bateratuaren egitarauaren barri izan genduan.

Abenduaren 3a, Euskararen Nazioarteko Eguna, euskararen balio unibertsala aldarrikatzeko xedez 1949. urtean sortu eban Eusko Ikaskuntzak. Dana dala, aldarrikapen hori eguneroko kontua dala azpimarratu behar da, ezta? Zer egingo dogu egun batez baino egiten ez badogu?

Egitarauari jagokonez, esango dogu  Donostian Euskara iruditan izena dauan sareko argazki mosaiko erraldoia eratuko dabela. Bertan, mota guztietako adierazleak bildu daitekez, adibidez: euskaraz dagoan udal agerkari zahar baten argazkia, lehen ikastola eta gau eskola baten argazkia, egungo txosten baten argazkia, errotulu batena... Horrez gain, gaurtik abenduaren 3ra ezaguna dan Mintzodromoa antolatu dabe, Bulevarrean jarritako karpan.

Gasteizen, barriz, abenduaren 2an Xabier Leteren omenezko kontzertua izango dabe eta larunbatean, Euskararen Nazioarteko Egunean, GazteHitz! kontzertu erraldoian besteak beste honako musika taldeek hartuko dabe parte: Lain, Kerobia, EH-Sukarra, Txapelpunk eta Gatibu. Bilbon, azken urteetan bezala, Banden Lehia egingo dabe, euskarazko hainbat musika talderen eskutik.

Eusko Jaurlaritzak, bere aldetik, euskararen aldeko pilota jaialdia antolatu dau abenduaren 2rako Donostiako Atano III. pilotalekuan. 22:15ean hasita jokatuko dan jaialdian, Xala eta Laskurain, Bengoetxea VI.aren eta Barriolaren aurka ariko dira partida nagusian; bertaratzen diran guztiek ez dabe sarrerarik ordaindu beharko. Helburua, ahalik eta euskaltzale gehien bertan egotea da, euskarari arnasa eta bultzada emoteko,  esan beharrekoa da Jaurlaritzak 1.500 sarrera banatu dauazala.

Euskararen Nazioarteko Egunaren ekimena martxan jarri eban Eusko Ikaskuntzak,  modu berezian ospatuko dau 2011ko edizio hau.

Batetik, Euskal Herriko historia era batean edo bestean markatu daben emakume guztiei omenaldia egin nahi deutse. Guztira, 44 emakume aukeratu dabez, horreek dira Kukuxumusuk egun berezi horri begira diseinatutako kamisetaren ardatz nagusia. Parte-hartzea sustatu nahian, lehiaketa bat be jarri dabe abian: Eusko Ikaskuntzaren webgunean sartuz (www.eusko-ikaskuntza.org/ene) kamisetan azaltzen diran 4 emakumeren inguruan galdera errazak jarri dabez. Abenduaren 2a baino lehen zuzen erantzuten dabenen artean, elastikoak zozkatuko dabez.

Bestetik, seigarren urtez, ENE Saria, euskara sustatzeko lanetan gehien nabarmendu dan kanpoko erakundeari egiten jakon errekonozimendua be aurrera eroango dau. Saria aitorpen publikoa eta Nestor Basterretxeak ENErako diseinatutako anagramaren burdina eta altzairu herdoilgaitzezko erreprodukzioa dira.

Etxepare Euskal Institutuak mundu osoan ospatuko dau egun hau, baina bereziki, Mexiko DFn, bertako Euskal Etxeak antolatutako festan parte hartzeko. Eguerdian bazkaria izango da bertan, eta ondoren, kontzertua eskainiko dabe Xabi eta Fredi Paya bertsolariek eta Ugarte anaia txalapartariek. Ohitura daben bezala, aurten, EITBko Goenkale telesaila omenduko dabe.

Aurreko guztiaz gain, asko izango dira egun horretan egingo diran ospakizunak. Ez ahaztu Euskera eguna ez dala bakarra, hizkuntza hau erabiltzen dogun guztiak baitira Euskera egunak. Beraz, badakigu zer egin: EUSKERA!

DURANGOKO EUSKAL DENDAREN XVI. EDIZIOA

Atzo, Bernat Vidal, Arbasoko presidentea, Andoni Iruarrizaga, Durangoko Kultura zinegotzia eta artisauak diran Amaia Conde, Alex González eta Igor Obeso batu ondoren, Durangoko Euskal Dendaren aurtengo leloa "Nire tailerra, Nire ogibidea, Nire bizimodua" izango dela adierazi eben.Dakizuenez, azoka hau Durangoko Diska eta Liburu Azokagaz batera antolatzen da.

Artisautzari jagokon garrantzia emon eta azpimarratu behar jako, hau da, bizimodua izateaz gain balio kultutalak eta garapen ekonomikoa be bultzatzen dau eta.

Euskal Herriko 50 eskulangile eta Galiziako 6 .bilduko dauazan azoka hau .erakusleiho ikaragarria da. Horreetako hiruren aurpegia azaldu da kartelean, hirurek izango dabelarik zuzeneko erakustaldiak egiteko aukera.

Arbaso Alkartea 2005ean hasi zan Artetsua sariak emoten, eskulangileak aintzat hartuz. Aurtengo Sari banaketa, abenduaren 3an, San Agustin kultur gunean izango da. Dana dala, atzo lau saridunetatik hiru adierazi ebezan: Bediako Udala, RNE Bilboko Mercedes Fernández kazetaria eta Mariano Santa Cruz eskulangilea. Laugarren sariduna nor dan ekitaldian bertan jakingo dogu.

EUSKAL HERRIA proiektuko LIP DUPa

Ikastolako 3 urteko umeek EUSKAL HERRIA  ezagutzeko proiektua burutu ondoren, ikasitako guztia erakusteko LIP-DUPa egin eben. Ikusi eizue bideoa!

Heldu jaku Lekeitioko Euskal Zine Bilera!

Francoren diktadura amaitu ondoren, gizartean eta Euskal Herriko politika eta kultura arloetan sortu ziran indarren eraginez sortu zan Euskal Zine eta Bideo Bilera, 70eko hamarkadan.

Garai haretan, hainbat eukeraren aldeko ardura eta lana areagotzen hasi zan baina euskera eta zinemagintza uztartzea ez zan erraza, ikus-entzunezkoen ekoizpen gehienak, danak ez  esatearren, gaztelaniazkoak ziran eta.  Gainera, euskeraz agertzen ziran filmak gaztelaniazkoekin lehian ibiltzen ziran, aldea handia zala. Gogotsuek 8 eta Super 8 formatuetan eta 16 m/m-tan egiten ebezan filmak.

Filmak euskaraz egiten ebezan amateurren oztopoak gainditu nahian sortu zan Euskal Zine Bilera. Lekeitioko zinemaldia ez zan garai haretan euskerazko filmen jaialdi bakarra. 1977an, Zestoan Topaketak zine-jaialdia sortu eben baina 1991n Zestoako antolatzaileek amore emon eben. Beraz, 1992tik hona Euskal Zine Bilera da euskerazko filmen jaialdi bakarra.

1981ean “Zilarrezko antzarrak” sariak emoten hasi ziran. Dokumental onenarentzako saria eta argumentudun film onenarentzako saria ezarri ziran, baita argazki onenarentzako saria eta soinu onenarentzako saria be.

Parte-hartzaile guztien artean grabatzeko material zinematografikoa banatzen jarraitu zan, honek lanean jarraitzeko aukera emoten eutsen eta.

1986an, bideoaren gorakada izugarria zanez, eta 8, Super 8 eta 16 m/m formatuetan gero eta lan gitxiago aurkezten zirala ikusita, Jaialdian bideo lanak onartzea erabaki zan. Horren ondorioz, ordura arte Euskal Zine Bilera izan zana aurrerantzean Euskal Zine eta Bideo Bilera (EZBB) izango zan.

1995ean merkatuan lehiatzeko asmoz egindako bideoak onartzen hasi ziran.Dana dala, beste eginkizun bat be baeben: hautatutako lan guztiak Interneten jartzea.
Aldaketa guzti hauen helburua, jaialdia etengabe aldatzen ari den ikus-entzunezkoen arlora moldatzea izan da; beti ere, hasieratik ezarritako nortasun-ezaugarriak ahaztu gabe. Hau da, Euskal Herrian euskaraz egiten diren ikus-entzunezkoak bultzatzen laguntzea.

Urteetan zehar hainbat ekintza egin dira, halanola, zinemari buruzko hitzaldiak, zinemari buruzko liburuen eta zinemagintzako tresnei eta makinei buruzko material etnografikoaren eta hainbat herrialdetako film-kartelen erakusketak, gai zehatzen inguruko zikloak, beste leku batzuetako (Katalunia, Galizia, Levante, Murtzia) zinemagileekin topaketak...

Jaialdi honen ibilbidean zehar euskal zinemako zuzendariak, arlo guztietako teknikariak eta irudi eta soinu eskoletan ikasitako teknikari asko aritu dira, bai lanean, bai afizionatu moduan.

Aipagarria da Lekeitioko Bilera abiagune ona izan dala errealizadore barrientzat,  jaialdiari esker euren sorkuntza-lanak erakutsi ez ezik, curriculuma hornitzen be hasi daitekezalako.

2007an, ohiko ekitaldiez gain beste  ekintza batzuk be antolatu ziran Lekeitioko Udaleko Kultur Erakundearekin batera, urteurrena ospatu eta ordura arte egindako ibilbidea gainbegiratzeko.

2008an, Lekeitioko Udaleko Kultur Erakundeak hartu eban antolatzeko ardura. Hala eta guztiz be, lehengo antolaketa taldeko partaide batzuek Zine eta bideo Bileraren antolaketan parte hartzen jarraitu dabe.2009an zenbait hobekuntza egin ziran;filmen proiekzioaz profesionalak arduratzen hasi ziran.
2010ean, krisialdia oraindik gainditu barik dagoala,Lekeitioko Udal Kultur Erakundeak zinemaldi duina izateko ahalegina egin dau.

2010eko nobedadea Benito Ansola Beka sortzea izan da Topagunearekin (Euskara Elkarteen Federazioa) alkar lanean.

Etorkizuneko jaialdiari indarra emoteko aldaketa batzuk egin dabez,adibidez, izena laburtu egingo da jatorrizkora bueltatuz eta zenbakia arabiar erara ipiniz. Web- orrialdea be barriztu egin dabe.

Ez da ahuntzaren gauerdiko eztla Lekeitioko hau, Donostiako Nazioarteko Zinemaldiaren aitorpena jaso eban, zinearen historiari buruzko bildumetan eta aldizkari espezializatuetan aipatzen da; gainera, euskal zinearen inguruko erakusketa eta jardunaldietan parte hartzen dau.

Lekeitio Cannes txikia izaten da jaialdi egunetan.


Web orrialdea: http://www.zinebilera.com/

Eusko Jaurlaritzak eta Galtzagorrik Klis-Klasikoak liburu-bilduma aurkeztu dabe

Haurrentzako eta gazteentzako euskarazko liburu onak, kalitatezkoak, egiteko helburuz sortu da ekimen hau.

Klis-Klasikoak izeneko liburu-bilduma aurkeztu eben barikuan Bego Muruaga Hizkuntza Politikarako Sailburuordetzaren (HPS) Euskara Sustatzeko zuzendariak, Aitziber Alonso Galtzagorri euskal Haur eta Gazte Literatura alkarteko presidenteak eta Ibon Egaña bilduma honen batzordearen kideak, Donostiako Koldo Mitxelena kulturunean.

 Bilduma honek euskerazko haur eta gazte literaturan egoan gabezi handi bati erantzuten deutso.   

Euskarazko eta haur eta gazte literaturako liburu klasikoak berrargitaratzeaz gain, literatura unibertsalean klasikoak diran eta euskeraz oraindik ez doguzan liburuak kaleratu nahi dira. Izan ere, euskerazko irakurtzeko zaletasuna sustatzeko ezinbestekoa da euskarazko kalitatezko liburuak eskaintzea. Izan ere, haur eta gazteek nazioarte-mailako hainbat autore klasiko ezagutzeko, beste hizkuntzetara jo behar izaten dabe.

Horren haritik, bildumaren aurkezpenarekin batera honako liburuak be aurkeztu ziran: Txan Fantasma, Maria Goikoak batbirulau, Indianoa eta Pinotxoren abenturak. Txan Fantasma Elkar argitaletxeak kaleratu dau; beste hirurak, barriz, Igela, Alberdania eta Ereinek alkarlanean.

BARTZELONAKO CENTRE CULTURAL- EUSKAL ETXEA

Eusko Jaurlaritzak Euskal Etxe honi 22.000 euroko diru-laguntza emongo deutso euskararen irakaskuntza bideratzeko. Laguntza horren bidez Bartzelonan euskara ikasi nahi dabenei, 170 lagun inguru, beharrezko baliabideak eskura jarriko deutsez. Bertan izan ziran hitzarmena sinatuz, Lurdes Auzmendi Eusko Jaurlaritzako Hizkuntza Politikarako sailburuordea eta Iñaki Uribe HABEko zuzendaria.

Bertako hainbat ikaslegaz be alkartu ziran, honeek   euren  kezka, jakin-min eta asmoen barri emon eutselarik.

Hitzarmena sinatu ostean, Auzmendi hainbat euskara ikaslegaz batu zan euren moduko jendea ikustea beretzat ohorea dala esan eutsen: "Ulertuko duzuen bezala niretzat ikaragarri pozgarria da Euskal Herritik kanpo ere euskara ikasi nahi duen jendea dagoela ikustea, eta konturatzea ugari direla euskararekiko eta euskal kulturarekiko interesa dutenak atzerrian ere. Nik ez etsitzera eta euskararen ikaskuntza aurrera egitera animatu nahi zaituztet".

Euskara eskolan esparru bi  bereizten dira, ikasle katalanez osotutako beheko mailak eta ikasle euskaldunez osotutako goiko mailak.

Azpimarratzekoa da, egiaztatze- frogak egiten diranetik, goiko mailetako ikasleen kopurua asko igo dala,  hizkuntza eskolan ez dago C maila egiteko aukerarik eta.

Bartzelonan  guztira, 500 ikasletik gora dagoz Euskal Etxe, Unibertsitate nahiz Hizkuntza Eskoletan euskara ikasten. Horreetatik % 80 ez dira euskal jatorrikoak. Tartean, katalanak ez ezik, jatorri ugaritako ikasleak be badagoz: ekuatortarrak, poloniarrak edo ingelesak, besteak beste.

Eusko Jaurlaritzak eta Centre Cultural-Euskal Etxeak sinatu daben hitzarmenaren helburua 2011/12 ikasturterako Bartzelonako Centre Cultural-Euskal Etxearen egitasmoak burutzeko oinarriak finkatzea da. Irakasle-taldearen trebakuntza dala eta, HABEk eta Bartzelonako Centre Cultural-Euskal Etxeak adostuko dabe trebakuntza-plana, eta bideratzearen ardura HABEk  hartuko dau. Honen ardura irakasle-taldea, beharrezkoa dauan oinarrizko materialez hornitzea izango da. Autoikaskuntza programen (BOGA) egikaritzeari jagokenez, HABEk, Euskal Etxearen eskariari, zerbitzu hori martxan jartzeko proposamena eta baliabideak emongo deutsoz. Jasotako diru-laguntzaren truke, Centre-Cultural Euskal Etxeak euskara-eskolak emotea ahalbidetuko dau, euskara autoikaskuntza bidez ikasteko sistema informatikoak bermatuz.

Auzmendiren esanetan, gainera, ez da ahaztu behar azken urteotan mundu zabalean handitu egin dela euskararenganako jakin-mina. Horren ildora, gero eta gehiago dira euskara eta euskal gaiak lantzeko interesa erakutsi duten unibertsitateak eta ikastegiak: "Momentu honetan bertan munduko lau kontinentetako 23 herrialdetako 65 euskal etxetan 2.500 helduk eta 1.500 haurrek baino gehiagok ikasten duten euskara. Gaineraz, munduko 23 unibertsitatetan euskara ikas daiteke".

KANTALDIA: Baionatik Bilbora-Iparraldea kantuz

"Baionatik Bilbora-Iparraldea kantuz" ,Iparraldeko euskal abeslariak, ataratako diska  barriaren aurkezpena datorren abenduaren 20an izango da, arratsaldeko 8retan, Euskalduna Jauregian.

ANIMA ZAITEZ!!

BILBON BESTE IZAR BAT!

Ez dakizuela zertaz ari garan? Ba, Bai, bai. Arzakek, Akelarrek eta Berastegik hiru izarrekin jarraitzen daben bitartean, ez dala erraza jakinda, Bilboko Guggenheimean dagoan Nerua jatetxeak Michelin gidaren  lehen izarra jaso dau. Hasi barria dan jatetxe honetako sukaldari buru  dan Josean Martinez ezustean eta pozik harrapatu dau albisteak, lanari ekiteko indarra eta konfiantza emongo deutsielakoan. Nerua jatetxea barria bada be, sukaldari honek hamahiru urte inguru daroaz Guggenheim museoko jatetxean sukaldari. Berak eta taldeak, Izar honetaz gain, Repsol gidaren hiru eguzki be lortu dauz.

Michelin Izarrak munduko gastronomiaren erreferente nagusi bilakatu dira. Dana dala, gogoratu behar dogu auto gurpilekin batera oparitzen eben publizitatez betetako liburutxoa izanez atara ebela 1900ean, nahiz eta jatetxerik onenak  izendatzen 1926an hasi.

Sari honeek urtero astintzen dabe  gure sukaldaritza, onerako zein txarrerako, hauxe gertatu jako Gasteizko Ikea jatetxeari, eukan izarra galduz. Beste batzuk, ostera, iazko moduan geratu dira, adibidez, Mugaritz jatetxea, izar bi mantenduz.

Zorionak, ba, Nerua jatetxeari!

ETXEPARE INSTITUTUA 20012an

Etxepare Euskal Institutuko 2012rako aurrekontua aurtengoaren antzekoa izango da, 2.8 milioikoa.

2012 urtean institutuak bere jarduera sendotzea, orain arte egindako lana finkatzea, 2010 eta 2011an sinatutako hitzarmenak (Cervantes Institutua, Donostia 2016, Euskaltzaindia, Institut Ramon Llull, Eitb, EKE, Euskadiko Filmategia...) garatu eta gorpuztea, hedapen-sareak indartzea, irakurle-programa handitzea eta plan estrategikoa garatzea espero dau.

Euskararen alorrari jagokonez, beste hizkuntza gitxituekiko talde-lana sustatuko da, topaketa eta seminarioak antolatuko dira, irakurleen formazioan lan egingo da eta katedra barriak sortuko dira. Esaterako, Chicagoko Koldo Mitxelena katedra apirilean inauguratuko da. Halaber, datorren urteko martxoan euskara omentzeko jardunaldiak antolatuko dira Madrilen Euskaltzaindiarekin batera.

Kultura alorrean, diru-laguntzak berregituratu eta eskaerari begira moldatuko dira eta ekintza finkatuko da Institutuarentzat toki estrategikoak diranetan (Madril, Bruselas eta New York). Holan, urtarrilean Etxepare Institutuaren aurkezpena egingo da Madrilen, programazio zabal bategaz, AT! Ikuskizuna barne, eta maiatzean New Yorkeko Lincoln Center-ean euskal zinemari buruzko atzera begirako erakusketa bat izango da.

Era berean, 2012ean euskal kultura sustatzeko lehen liburuak argitaratuko dira. Bilduma honek gastronomiari, tradizioari, pop, rock zein folk musikari, musika klasikoari zein zinemari buruzko monografikoak izango dauz.



46. DURANGOKO Euskal Liburu eta Disko Azoka

1965ean, Gerediaga Elkarteak  antolatu eban lehen ekitaldietako bat izan zan. Helburua, frankismoaren diktadurapeko urteak zirala kontua hartuta, Euskal Herriko liburugintza eta diskogintzako ekoizpena ezagutzera emotea izan zan. Horrekin batera, euskalgintza jardunean ebilzan sektoreen topalekua izatea be lortu nahi eban.

Kokapen ugari izan ditu Durangoko Azokak (Andra Mari elizpea, merkatu plaza, Durangoko hainbat orubetan jarritako karpak). Dana dala, 2005etik Landako Erakustazokan egiten da.Hitzordua abenduaren hasierako jaiegunak aprobexatuz finkatzen da urtero.

Aurten abenduaren 4tik 8ra zabalduko da, goizeko 10:30etik iluntzeko 20:00etara. Urtero bezala, nobedadez beterik etorriko jaku, nahiz eta krisiaren eraginez honeek gitxiago diran. Hiru gune zabalduko dabez: Irudienea, Szenatokia eta Kabi@, ikus-entzunezkoei, antzerkigintzari eta teknologia barriei bidea irekiz. Berrehun ekitalditik  gora izango dirala azpimarratu behar da. Ahotsenea, literatura eta musika sortzaileei eskainitako gunea eta Haur Literatura Aretoa be zabalik egongo dira.

Kultura gonbidatua, Galizia izango da, horregaitik, ba, hainbat ekitaldi  Culturgal alkartearekin egingo dira.

Barri gehiago izan gura badozue jo helbide honetara: www.durangokoazoka.com