Joan dan azaroaren 11n, Eusko Ikastola Batzaren (EIB) 25 urteurrena ospatu genduan.
EUSKO IKASTOLA BATZA (EIB) Ikastola alkartea, lau ikastolak sortu eben 1986.urtean: Bizkaiko LAUAXETAk eta LAUROk, Gipuzkoako EKINTZAk eta Arabako OLABIDEk. Gaur egun alkartea 12 ikastolak osatzen dau eta 10.000 ikasle baino gehiago batzen ditu, Ikastoletako ikasleen %25, hain zuzen.
EIB sortzearen helburu nagusia,hezkuntza proiektuen eta Ikastola bakoitzaren autonomiaren alde lan egitea izan zan, azken alderdi honi, administrazio publikotik jaso eikezan finantziazioaren gainetik lehentasuna emonez
25 urte honeetan, EIB euskera eta Euskal Kulturaren alde egindako ekarpenengaitik eta hainbat instituziotatik jasotako hezkuntza- proiektuen kalitatezko sariengaitik nabarmendu da. Bikaintasun sari gehien dabezan ikastolak batzen dira alkarte honetan (Award 1, 2 Price eta 2 europar finalista, urrezko 3 Q eta Eusko Jaurlaritzaren zilarrezko 7 Q, 2 MEC sari...).
2011/11/10ean ospatu dogun ekitaldian EIBk bere konpromisoa barritu dau honakoakaz:
- Euskera, gure Kultura eta baloreak.
- Kalitatea hezkuntzan eta kudeaketan.
- Barrikuntzarako bokazioa eta ahalmenaren garapena.
EIBko IKASTOLAK:
- Bilboko ARTXANDAPE
- Bilboko BEGOÑAZPI
- Markina-Xemeingo BERAKRUZ
- Donostiako EKINTZA
- Bilboko KARMENGO
- Zornotzako LAUAXETA
- Loiuko LAURO
- Donostiako MARIAREN BIHOTZA
- Bergarako MARIAREN LAGUNDIA
- Gasteizko OLABIDE
- Ondarroako TXOMIN AGIRRE
- Gernika-Lumoko SAN FIDEL
Ospakizuna EHUk Bilbon daukan Bizkaia Aretoan izan zan. Bertan, lehena eta oraina batzeko aukera izan genduan. Ekitaldi hunkigarria eta EIB gauzatzeko hainbat lan eta ahalegin egin ebenak , baita gure artean ez dagozanak be, gogoratzeko unea izan genduan.
Askatasunez bizi gaitezen
gaur hasita gero ere bai
Euskal Herriak bizirauteko
bake-bakean eta alai.
Euskal sustraian oinarrituta
ea garen guztiok gai
euskarak eta gure kulturak
beti tinko dezan jarrai.
